Skyldusparnaður og ríkistjórn í dag

Þessi pistill var sendur á [e-mail] . Sendandi var, Páll Stefán Erlendsson 

Komiði sæl.

Eftir allt sem á undan hefur gengið, varðandi gjaldþrot Íslands, þá er eitt atriði sem enginn hefur minnst á í umræðunni, skyldusparnaður. Það er verið að tala um að komandi kynslóð, eða jafnvel kynslóðir, þurfi að borga brúsann í formi skatta eða álíka formi. Af hverju er ekki tekið upp þetta gamla form, skyldusparnaður? Það ætti að létta undir "næstu" kynslóð, td varðandi íbúðarkaup. Ég er 34 ára gamall og byrjaði að vinna 16 ára og þá var dreginn af mér skyldusparnaður. Síðustu ár hef ég eiginlega bölvað því að þetta form hafi verið tekið af og finnst bara ótrúlegt að maður eins og Steingrímur J. hafi ekki einu sinni viðrað þessa hugmynd uppá síðkastið. Foreldrar mínir byggðu 230fm hús fyrir skyldusparnaðinn sinn á sínum tíma!...sparimerki hét það þá reyndar. Hversu slæmt getur það verið? Skyldusparnaður er hugmynd sem getur bara verið góð eins og staðan er í dag. 

Svo er nú margt annað sem er vægast sagt útúr korti í þessu "lýðveldi" okkar. Ef Geir H. væri þjálfari fótboltaliðsins Ísland (ráðherrar væru leikmennirnir), þá væri búið að krefjast þess að hann segði af sér eða hann væri einfaldlega rekinn fyrir lélega framistöðu liðsins og stokkað væri upp í leikmannahópnum, s.s. leikmenn látnir fara frá félaginu. Þetta er ekki flókið í boltanum. Hvernig stendur á því að þessi ríkisstjórn er enn við völd? Allir vita hver tók fyrstu skóflustungu að jarðarför Íslands. Það var kóngurinn sjálfur Davíð Oddsson. Það er alveg merkilegt að engum skuli detta í hug að draga hann, ásamt Halldóri Ásgrímssyni, fyrir dómsstóla og dæma þá samkvæmt hryðjuverkalögum í Bretlandi! Það væri réttast. En að þessi ríkisstjórn skuli svo halda áfram þeirri stefnu sem var í gangi meðan Framsókn var í stjórn með Flokknum, er til háborinnar skammar. Það er ekki hlustað á nein rök frá ótal hagfræðingum, prófesorum og prófesorum í ótal hagfræðum. Eigum við að láta líffræðing, flugfreyju og dýralækni ákveða örlög landsins? Ekki skánar það þegar lögfræðimenntaður Seðlabankastjóri, sem virðist vera með greindarvísitölu á við bilaða brauðrist og óraunhæft vit á peningum, stjórnar öllu úr fílabeinsturni sínum og segir að allir séu vitlausir nema hann. Hvað þarf eiginlega að gerast svo menn taki ábyrgð á því sem þeir gera vitlaust? Ef ég kem tíu sinnum í vinnuna klukkan 9 en á að mæta 8 þá er ég rekinn! Þá þarf ég að bera ábyrgð á því að koma mér ekki í vinnuna á réttum tíma, og ábyrgðin fellst í því......... að ég missi vinnuna. Það kemur bara einhver annar og mætir á réttum tíma í vinnuna. Mig langar að vita hversu langt menn geta gengið í eins alvarlegum málum og við erum að horfa uppá þessa dagana. Hvar er línan? Er kannski engin lína og menn geta, eins og Davíð Oddsson, bara drullað yfir heila þjóð af því að það þóknast þeim ekki að fara eftir ráðum annara? Það er öllu kennt um, nema að sjálfsögðu íslenskum stjórnvöldum. Hvernig gat Fjármálaeftirlitið leyft þessu að ganga svona langt? Tólfföld þjóðarframleiðsla! Ég veit fyrir víst að þetta er langt frá því að vera mér að kenna þó ég skuldi 200 þúsund í yfirdráttarheimild.  

Ég horfi alltaf á Kastljós ef ég hef tök á því. Mér finnst frábært að sjá Helga Seljan og Sigmar þjarma að fólki til að fá svör sem flestir skilja. Ekki einhverja hringavitleysu eins og eftirlaunafrumvarp þingmanna ætlar að vera á alþingi. En eins og þessi þröngi hópur manna og kvenna í ríkisstjórn Íslands er búinn að fara með þjóð sína, finnst mér í góðu lagi að láta þau svara núna almennilega fyrir það sem þau hafa gert. Það er ekki hægt að kenna Jóni Ásgeir, Björgólfi eða hvað þessir kallar heita allir, um allt sem farið hefur til andskotans. Þeir fengu leyfi frá fyrri ríkisstjórn, sem og þessari sem situr nú, til að spreða peningum eins og þeir vildu. Ég veit fyrir víst að ef ég hefði fengið Landsbanka Íslands í skiptum fyrir hálfétið epli, útrunnið Prins Póló og opna kók í gleri, þá er alveg pottþétt að ég hefði gert nákvæmlega það sem þeir gerðu. Búið til feita gjaldskrá með allskonar skúffugjöldum og rugli til að kaupa mér einkaþotu og fullt af drasli sem kostar haug af peningum. Þá langaði að eyða heilum haug af peningum, og hvar getur maður fengið haug af peningum.....nú auðvitað með því að kaupa banka!..... í landi þar sem núverandi seðlabankastjóri, sem heldur úti okurvöxtum og hjálpaði nýju bankaeigendunum að græða ekki bara helling heldur haug af peningum með vaxtastefnu sinni, var aðalmaðurinn í að selja alla banka og einkavæða alla skapaða hluti. Þeir vissu alveg að það kæmist enginn erlendur banki til að fara í samkeppni við þá, þar sem það voru bara þrír bankar sem áttu bankakerfið á Íslandi og engum öðrum var boðið í íslenska bankapartýið. Simbabwe hvað!! Lýðræði hvað?!! Íslendingar eru búnir að vera þrælar Davíðs alltof lengi. 

Kastljósfólk! spyrjið um skyldusparnaðinn og fáið svör!.... og rannsakið hvað lýðræðislega kosnar ríkisstjórnir, eða seðlabankastjórar geta gengið langt í að ganga frá þegnum sínum án þess að þurfa taka ábyrgð eða bara svara fyrir það yfir yfirleitt. Samkvæmt mínum kokkabókum hlýtur það að vera fyrst og fremst ríkisstjórnin. Yfirmaður Íslands ber ábyrgð á því hvernig komið er fyrir Íslandi. Voru ekki Páll Magnússon og Þórhallur Gunnarsson dregnir fyrir Blaðamannafélagið eða álíka nefnd, þar sem þeir þurftu að verjast ásökunum Jónínu Bjartmars gagnvart Helga Seljan, af því að þeir eru yfirmenn hans? Núna er staðan mun alvarlegri.....og á þá að kenna skúringakonunni í forsætisráðuneytinu um allt saman? Hvað með Árna dýralækni? Eða fermingardrenginn hann Björgvin viðskiptaráðherra? Af hverju buðu þessir menn kreppuna velkomna til Íslands? Af hverju var ekki tekið í taumana fyrir löngu síðan? Eru þeir kannski ekki starfi sínu vaxnir?   Fáum utanaðkomandi mann í Seðlabankann sem hefur enga hagsmuna að gæta á Íslandi og kann ekki stakt orð í íslensku. Ef það er ekki ástæða núna að kjósa nýja ríkisstjórn, hvenær er það þá? Hvar er sú lína?Þeir sem stjórna núna eru búnir að fá sinn sjéns. Prufum Vinstri Græn eða Frjálslynda til að stjórna, ekki getur það versnað. Fáum óháða, erlenda, hámenntaða, reynslumikla ráðgjafa í ráðuneytin. Fólk með sérhæfingar sem hæfir hverju ráðuneyti fyrir sig. Ég treysti ekki dýralækni, sem þurfti að flytja sig milli landshluta og færa lögheimili sitt í fjárhús á suðurlandi til að ná kjöri, fyrir fjármálum landsins. Tökum upp skyldusparnað.

Takk fyrir. Páll Stefán Erlendsson